ఏం సందేహం లేదు (em sandEham lEdu) - ఊహలు గుసగుసలాడే

పల్లవి:
అతడు: ఏం సందేహం లేదు ఆ అందాల నవ్వే ఈ సందళ్ళు తెచ్చింది
ఏం సందేహం లేదు ఆ కందేటి సిగ్గే ఈ తొందర్లు ఇచ్చింది
ఏం సందేహం లేదు ఆ గంధాల గొంతే ఆనందాలు పెంచింది
నిమిషము నేల మీద నిలువని కాలి లాగ మది నిను చేరుతోందె చిలకా
తనకొక తోడు లాగ వెనకనే సాగుతోందే హృదయము రాసుకున్న లేఖా

ఏం సందేహం లేదు ఆ అందాల నవ్వే ఈ సందళ్ళు తెచ్చింది
ఏం సందేహం లేదు ఆ కందేటి సిగ్గే ఈ తొందర్లు ఇచ్చింది

చరణం-1:
ఆమె: వెన్నెల్లో ఉన్నా వెచ్చంగా ఉంది నిన్నే ఊహిస్తుంటే
ఎందర్లో ఉన్నా ఏదోలా ఉంది నువ్వే గుర్తొస్తుంటే
నా కళ్ళల్లోకొచ్చి నీ కళ్ళాపి జల్లి ఓ ముగ్గేసి వెళ్లావే
నిదురిక రాదు అన్న నిజముని మోసుకుంటు మది నిను చేరుతుంది చిలకా
తనకొక తోడు లాగ వెనకనె సాగుతోంది హృదయము రాసుకున్న లేఖా

ఆమె, అతడు: వెన్నెల్లో ఉన్నా వెచ్చంగా ఉంది నిన్నే ఊహిస్తుంటే
ఎందర్లో ఉన్నా ఏదోలా ఉంది నువ్వేగుర్తొస్తుంటే

చరణం-2:
అతడు: నీ కొమ్మల్లో గువ్వ ఆ గుమ్మంలోకెళ్ళి కూ అంటుంది విన్నావా
నీ మబ్బుల్లో జల్లు ఆ ముంగిట్లో పూలు పూయిస్తే చాలన్నావా
ఏమవుతున్నాగాని ఏమైనా అయిపోని ఏం ఫర్వాలేదన్నావా
ఆమె: అడుగులు వేయలేక అటు ఇటు తేల్చుకోక సతమత మైన గుండె గనుక
అడిగినదానికింక బదులిక పంపుతుంది పదములు లేని మౌన లేఖా

రచన: అనంత శ్రీరామ్
సంగీతం: కళ్యాణి కోడూరి
గానం: కళ్యాణి కోడూరి, సునీత
చిత్రం: ఊహలు గుసగుసలాడే (2014)